Non queda nada na Casa Cornide. O edificio, aínda propiedade dos Franco, pero en proceso de recuperación para o patrimonio público, está absolutamente baleiro, como comprobamos este luns na nosa visita fallida. A familia propietaria nótase que non quere que lle pase como no Pazo de Meirás e baleirou absolutamente todo o mobiliario, perdéndonos estampas como as que se publicaron no seu momento nun portal inmobiliario (cómpre lembrar que non está permitdo sacar fotos do interior).
Os grandes salóns e bibliotecas, os longos corredoires, as mullidas moquetas, as paredes estampadas con papeis de motivos florais, os espectaculares vestidoiros con armarios empotrados e impresionantes portas, e algunha que outra lámpada dan conta da excepcionalidade deste inmoble. Máis impresionantes son aínda as escaleiras de pedra interiores que parecen dunha catedral.
As visitas pódense reservar na agochada web https://casacornide.simplybook.it/v2/. As datas que permite reservar son só os luns de 9:00 a 13:00 (4 horas á semana), o mínimo que lles obriga a lei.
Un pouco de historia
Como nos conta David Sobrino nun artigo publicado en historiadegalicia.gal, este pazo urbano barroco erguido no século XVII pola familia do iustrado José Cornide, xeógrafo, naturalista e membro dunha das familias máis influentes da cidade, foi roubado polos Franco entre finais dos anos 50 e comezos dos 60 nunha permuta promovida polo entón alcalde Alfonso Molina (aínda cunha das rúas máis importantes da cidade ao seu nome…) e tras unha subasta tramposa na que o banqueiro Pedro Barrié de la Maza adquiriu o inmoble e llo revendeu a Carmen Polo, esposa de Franco, por un prezo irrisorio.
Non contentos con este regalo, o Concello chegou a realizar unhas obras de remodelación por 1,3 millóns de pesetas…
Dende aquel 1962, ata o 2025, máis de 60 anos o espazo estivo pechado ao publico, ata que un informe histórico elaborado por Vigo Trasancos por encargo do Instituto Cornide, o Concello da Coruña promoveu a súa declaración como Ben de Interese Cultural (BIC) en 2023. Aínda tardou a familia Franco dous anos en cumprir a lei e abrir a casa 4 horas á semana.
Podedes tamén completar a información histórica co repaso que Sobrino fixo dun traballo de Vigo Trasancos sobre o edificio tamén en historiadegalicia.gal ou no podcast Larentando.
Máis novas
Unanimidade, con matices, no pleno da Coruña para apoiar o proceso de recuperación da Casa Cornide
A apertura da Casa Cornide ao público: queixas polas reservas para un inmoble “baleiro”
