As incautacións de cocaína disparáronse un 386% en Galicia en 2025, ata alcanzar as 9,3 toneladas. O que supón case cinco veces máis que o ano anterior, cando se interviñeron 1.922 quilos.

A comunidade galega concentrou en 2025 o 12,13% do total nacional de cocaína incautada, segundo recolle a Estatística Anual sobre Drogas do Centro de Intelixencia contra o Terrorismo e o Crime Organizado (CITCO).

A provincia da Coruña concentrou a maioría dos comisos de cocaína do pasado ano, ao rexistrar 6,4 toneladas do total. A última, acontecida en Muxía esta pasada semana.
Pola súa banda, a de Pontevedra superou as 2,8 toneladas; na de Lugo interviñéronse máis de 10 quilos e na de Ourense case cinco quilos.

Xunto á cocaína, Galicia rexistrou en 2025 un total de 181 quilos de haxix, un 29,52% máis que en 2024, cando se habían incautado 140 quilos. No caso da marihuana, as cantidades pasaron de 119 quilos a 142 quilos, un incremento do 19,37%.

O informe, feito público este mércores polo Ministerio do Interior, tamén reflicte un aumento de forma destacada da incautación de plantas de cannabis, que alcanzou as 5.723 unidades, un 186,29% máis que en 2024.

Así mesmo, as intervencións de MDMA-éxtases ascenderon a 2.133 unidades, un 660,83% máis. Outro dos incrementos máis destacados corresponde á metanfetaminas, con 2.069 unidades incautadas, un 20.590% máis que o ano anterior.

En sentido contrario, as incautacións de heroína descenderon un 52,95%, ata 13.340 gramos, mentres que as de poppers reducíronse un 58,93%, ata 520 cc. Tamén se reduciron as intervencións de anfetamina un 45,83% e as de MDA baixaron un 94,53%

713 DETENCIÓNS

En canto á actividade policial, Galicia contabilizou 713 detencións relacionadas con drogas en 2025, un 7,54% máis que en 2024, mentres que o número de denunciados descendeu un 11,85%, ata 9.307.

A maior parte das detencións produciuse na provincia de Pontevedra (297), seguida da da Coruña (279), Ourense (67) e Lugo (65).