O BNG demandou ao Goberno do Estado que execute con carácter urxente as actuacións necesarias para mellorar a seguridade no tramo ferroviario próximo á Ría do Burgo, nas zonas de Os Castros, As Xubias e A Pasaxe, na cidade da Coruña. O deputado do Bloque no Congreso, Néstor Rego, denunciou o atraso no proxecto de mellora dos peches das vías e esixiu tamén o arranxo inmediato do paso elevado, actualmente en avanzado estado de deterioración.

Rego lembrou que o novembro de 2025 o Goberno asegurou, en resposta a unha iniciativa do BNG, que estas actuacións se atopaban en fase de planificación dentro do proxecto de reposición e execución de peches da rede convencional. “Pasaron os meses e a situación segue sen resolverse, mentres os veciños continúan expostos a unha situación de evidente risco“, denunciou.

O deputado nacionalista puxo o foco especialmente no estado do paso elevado sobre as vías, cuxas varandas presentan unha importante deterioración e oxidación, ata o punto de que parte da estrutura permanece precintada e que foi necesario instalar elementos provisionais. “Non é admisible que se manteña durante meses un paso utilizado habitualmente polos veciños nunhas condicións que poden comprometer a súa seguridade”, sinala Rego, que reclama ao Goberno unha intervención inmediata.

O BNG ve imprescindible, ademais, reforzar o peche da infraestrutura ferroviaria e habilitar pasos peonís seguros e sinalizados ao asegurar que se trata dunha zona con vivendas e terras de cultivo a ambos os dous lados das vías e cun importante tránsito diario de persoas que se desprazan cara ao Complexo Hospitalario Universitario da Coruña (Chuac) e ás empresas e instalacións próximas.

Rego avisa de que a “falta de medidas de protección non é unha cuestión menor” tendo en conta que desde 2016 “rexistráronse seis falecementos de persoas atropeladas por trens neste ámbito”. “O Goberno coñece perfectamente esta realidade e non pode seguir aprazando actuacións que son necesarias para previr novos accidentes”, sinala.