A alcaldesa da Coruña, Inés Rey, criticou este xoves a presenza do presidente da Xunta, Alfonso Rueda, na concentración celebrada o mércores na praza de María Pita en apoio a Ceuta e advertiu de que “a solidariedade non é só envolverse nunha bandeira e berrar contra o presidente do Goberno”. A tamén primeira vicepresidenta da Federación Española de Municipios e Provincias (FEMP) pronunciouse así a preguntas dos xornalistas durante unha visita ás obras de remodelación do paseo da ría do Burgo, despois dunha protesta na que se escoitaron insultos contra Pedro Sánchez e peticións para que dimitise.

Rey defendeu que a solidariedade implica tamén “destinar recursos para axudar a quen máis o precisa e preocuparse polos menores que están nunha situación moi dramática na cidade de Ceuta”. Neste sentido, dirixiuse aos responsables do Partido Popular que participaron nas concentracións e confiou en que esa mostra de apoio se traduza agora nunha disposición favorable á acollida de menores migrantes.

“Imaxino que despois da onda de solidariedade con Ceuta que houbo onte en moitos concellos de España serán os primeiros en poñerse á disposición do Goberno central para acoller eses menores”, afirmou. A alcaldesa engadiu que tamén espera que os populares acepten o traslado destes menores ás distintas comunidades autónomas co obxectivo de axilizar os procesos de identificación e aliviar a situación existente en Ceuta.

CRÍTICAS DIRECTAS A RUEDA

Rey puxo especialmente o foco en Alfonso Rueda e considerou que as concentracións deberían provocar “unha reflexión a toda a clase política, pero especialmente ao presidente da Xunta”. Ao seu xuízo, Rueda participou nunha “concentración de carácter partidista con evidentes fins políticos” e na que a solidariedade con Ceuta acabou quedando nun segundo plano. “Non esquezamos que a presunta solidariedade con Ceuta era a escusa para estar nunha concentración que vai contra o Goberno”, sostivo.

A rexedora incidiu en que os cánticos escoitados durante a protesta “non estaban enfocados a amosar a solidariedade co pobo ceutí, senón a atacar o presidente do Goberno e outros cargos socialistas”. Por iso, reclamou responsabilidade institucional nos momentos de crise e defendeu a necesidade de que Administración central, comunidades autónomas e entidades locais actúen con unidade e respecto ás institucións.

O PP ACUSA A REY DE ESCOLLER “O SANCHISMO”

As palabras da alcaldesa tiveron resposta do portavoz municipal do PP na Coruña, Miguel Lorenzo, que acusou Rey de antepoñer a defensa de Pedro Sánchez aos intereses da cidadanía. “Inés Rey tiña que elixir onte entre os coruñeses ou Pedro Sánchez e escolleu o sanchismo”, afirmou nun comunicado. Lorenzo reprochoulle que non participase na concentración e asegurou que outros alcaldes socialistas si estiveron cos seus veciños apoiando a Ceuta. “O mimetismo de Inés Rey con Pedro Sánchez é total”, engadiu. O portavoz popular defendeu ademais que “a defensa da soberanía española e dos dereitos e liberdades de todos os españois debe situarse por enriba de calquera diferenza política ou partidista” e reclamou responsabilidade e unidade ante a crise.