A sección segunda da Audiencia Provincial da Coruña celebrará os días 5, 6, 7, 8 e 9, con Tribunal de Xurado, o xuízo contra un home acusado de matar a outro ao que coñecía e ao que debía diñeiro.

Así o recolle o escrito de cualificación fiscal que sinala que o 23 de setembro de 2021 o procesado concertou unha cita co falecido, a quen coñecía desde facía anos, coa finalidade, segundo dicía, de pagarlle unha cantidade de diñeiro que lle debía e que este viña reclamando insistentemente desde facía meses.

O home, a pesar de ter un traballo estable, “atopábase nunha situación económica angustiosa debido, fundamentalmente, aos gastos que lle xeraba a súa adicción á cocaína”. “Por este motivo, debía diñeiro a outras persoas e a distintas empresas de crédito, comerciais e de subministracións e os seus saldos bancarios arroxaban resultado negativo”, sinala Fiscalía.

Na mañá do día 23, os dous homes víronse na casa na que o falecido vivía arrendado. “Unha vez no interior da casa, o procesado, guiado do ánimo de acabar coa súa vida”, abalanzouse, engade o Ministerio Público, sobre o home e asestoulle “18 puñaladas nas costas e unha máis á altura do esternón”.

Fiscalía indica que o procesado desconectou todos os interruptores do cadro eléctrico e foise da casa co teléfono móbil do falecido, que vivía no Barrio das Flores.

O seu cadáver non foi achado ata o 30 de setembro cando o fillo da caseira accedeu á vivenda alarmado pola falta de noticias do seu inquilino. O 3 de novembro foi detido o acusado, do que Fiscalía afirma que non tiña alteradas as súas facultades de entendemento e vontade no momento dos feitos.

O Ministerio Público cualifica os feitos como constitutivos dun delito de asasinato por aleivosía e ensañamiento polo que pide a pena de 21 anos de cárcere, ademais do pago dunha indemnización de 75.000 euros ao fillo do falecido.