A Dirección Xeral de Saúde Pública realizará este xoves unha análise de control de augas no concello de Betanzos polo brote de gastroenterite. “Con todo, este estudo non será aínda determinante dado que o consistorio deberá finalizar coas tarefas que ten pendentes e que determinarán a potabilidade da auga”, engade.

Nesta xornada, a alcaldesa en funcións, María Barral, xunto a técnicos da empresa concesionaria do servizo de abastecemento de auga, Viaqua, e responsables de Sanidade, mantiveron este mediodía de mércores en Santiago unha reunión de seguimento pola situación da auga e o citado brote para analizar a situación e o plan de desinfección realizado por Viaqua para a eliminación do norovirus.

A primeira edil explicou que o programa de desinfección desenvolvido por esta, seguindo as formulacións realizadas desde Sanidade, está finalizado co que “mañá mesmo” desde o citado departamento autonómico “tomaranse mostras en varios puntos da rede para, posteriormente, realizar a correspondente analítica para comprobar que a desinfección foi correcta”.

O consistorio engade que a próxima semana Sanidade tomará outras mostras noutros puntos que determinarán, tras a súa análise en laboratorio, se a auga é apta ou non para o consumo. En todo caso, “espérase que o día 15 e non antes desta data sexa cando se determine se a auga está apta ou non para o consumo”.

María Barral tamén indicou que por parte de Augas de Galicia tomáronse, tal e como pedía o consistorio, “mostras en varios puntos do río, na zona de captación e río arriba”. “Con todos os resultados sobre a mesa, determinarase o día de volta á normalidade”, apostila.

Pola súa banda, Sanidade precisa que a xestora de augas do municipio concluíu a primeira parte do proceso, coa realización de tarefas de hipercloración das augas que tiñan como obxectivo eliminar o virus causante do brote. “Agora, o concello deberá concluír coa segunda fase do proceso”.

“Isto é, reducir os niveis de cloro durante os próximos días, realizar unha nova analítica e comprobar que a auga é apta para o consumo humano”. Sobre unha nova análise, “previsiblemente a próxima semana”, apostila que se os resultados son idóneos remitirase un informe de idoneidade ao concello, “organismo que ten competencias para levantar as limitacións de consumo de auga”, indica sobre as restricións existentes.