Entidades LGTBI denunciaron que están “ameazados pola dereita e a ultradereita” e reclamaron o apoio das institucións para garantir os dereitos deste colectivo. Fixérono este mércores, en declaracións aos medios, tras un encontro co delegado do Goberno en Galicia, Pedro Blanco, e a subdelegada do Goberno na Coruña, María Rivas, con motivo da celebración do Día do Orgullo no que despregaron unha bandeira conmemorativa na fachada da Delegación da cidade herculina.

“Os nosos dereitos están a verse ameazados, a dereita e ultradereita está a dicir claramente que o primeiro que faría se chega ao Goberno é derrogar a Lei LGTBI e Trans, recentemente aprobadas”, explicou a presidenta da Asociación pola Liberdade Afectiva e Sexual (Alas) A Coruña, Ana García. “Faise máis necesario que nunca que as institucións nos apoien nun momento no que queren borrarnos”, reclamou.

García, ademais, apelou a “toda a cidadanía” para que non as deixen “soas”. “Os dereitos do colectivo LGTBI son dereitos sociais, humanos e importantes para toda a sociedade, temos que seguir avanzando e camiñando cara unha sociedade máis diversa, máis xusta e máis igualitaria, non volver á España do Nodo”, indicou.

Na mesma liña, o director do festival que dá visibilidade á liberdade afectivo sexual CoruFest, Gustavo do Río, recalcou que “hai que seguir loitando” polos dereitos do colectivo.

MANIFESTACIÓN

Nesta cita, confirmouse tamén a convocatoria por parte de Alas A Coruña dunha manifestación na cidade herculina. Será este mércores, con motivo do Día do Orgullo LGTBI e poucos días antes de que se cumpran dous anos da morte de Samuel Luiz tras recibir unha malleira por parte doutros mozos nas inmediacións do Paseo Marítimo coruñés.

Baixo a lema ‘Orgullo LGTBI+: Revoltas do pasado, celebración do presente e conquistas de futuro’, entidades LGTBI, asociacións feministas, sindicatos e partidos políticos percorrerán, a partir das 19,30 horas, o tramo entre a praza de Ourense e María Pita, onde terminará a mobilización coa lectura dun manifesto.