A zona da Marina acolle ata 22 de xaneiro de 2024, a colección de murais de azulexos “Os naufraxios da Costa da Morte”. Trátrase do proxecto social da empresa Suministros Lar, que leva dende 2006 organizando concursos bianuais nos que centros de ensino de toda a provincia se achegan á arte do azulexo, participando nun proxecto multidisciplinar que afonda sobre as realidades e as historias da comarca da Costa da Morte.
Unha Mostra perfecta para que o milleiros de visitantes que atracan no porto coruñes a través dos cruceiros poidan coñecer a historia desta singular comarca, e que mirada á perfección coa exposición que presenta a Fundación Marta Ortega sobre o fotógrafo Helmut Newton.
Neste caso, a exposición recolle 9 murais de azulexo realizados por alumnos dos institutos e usuarios das asociacións Apem e Aspaber, que recollen a historia doutros tantos naufraxios. Así, paseando polo centro da vila poderás coñecer a historia do City of Agra, un barco inglés afundido en Arou, Camariñas, La Bayonnaise, unha corbeta francesa afundida en Finisterre, ou o buque inglés Serpent, que afundiu na enseada de Trece de Camariñas, e cuios tripulantes falecidos xacen no mítico Cemiterio dos Ingleses.
Trátase dun proxecto transversal, que vincula a educación, a inclusión, a creatividade e o desenvolvemento do talento dunha forma extraordinaria coas nosas raíces, ao tempo que potencia as capacidades, e todo isto queda plasmado nunha auténtica obra arquitectónica con todo o aprendido durante o proceso.
A iniciativa permite aos centros participantes realizar unha completa inmersión en cada temática. Desta volta, mergulláronse na historia dos naufraxios, escoitando as charlas do mariñeiro e gran coñecedor Pepe de Olegario. Escolleron un evento e investigaron sobre el para deseñar a súa obra, e despois facer ese traballo manual tan necesario nos tempos das tabletas.
