Está de moda o certificado Destino Starlight, e a comarca Reserva da Biosfera Mariñas Coruñesas non é allea. A comarca recibía a pasada semana na FITUR a súa distinción como Destino Turístico Starlight para promover o astroturismo a través dunha oferta específica.
É certo que o ceo en moitas das nosas áreas rurais é especial, pola baixa incidencia lumínica, de aí que a Fundación Starlight aprobase esta certificación, como recentemente ten recibido a Costa da Morte.
Ademais da entrega do distintivo, na reunión tratouse as próximas actuacións que está a preparar a Reserva vinculadas a ser Destino Starlight. Tras celebrar a finais de 2023 o primeiro Curso de Monitores Astronómicos, Mariñas Coruñesas celebrará este ano un novo encontro Starlight.
As Mariñas estarán presentes tamén no Encontro Anual Starlight, que coincidirá este ano en 2024 coa II Xornada Internacional de Astroturismo por Starlight, que se celebra cada 3 anos. Trátase do encontro máis relevante e significativo de profesionais, empresas, entidades públicas e privadas, vinculadas ao astroturismo e ao desenvolvemento local sostible, ao patrimonio natural e cultural asociado á luz das estrelas, á protección do ceo e á difusión da astronomía.
