A finais de verán temos na comarca veciña festival de música tecno. O 13 e 14 de setembro no xardín botánico e no aquapark de Cerceda terá lugar o Go! Electronic Festival, o evento contará con un escenario diurno e outro nocturno, zona de camping e foodtracks.
Conversamos con Jorge, RJ Junior dj, mítico da zona do Parque Europa, promotor do festival para que nos poña un pouco ao tanto do evento e da escena tecno galega.
- 1- Parece que Cerceda está destinada a festivais de música electrónica, os primeiros foron o Fresh Weekend e o Freelive Festival. Como nace Go! electronic Festival?
Levaba uns anos en mente o proxecto pero apareceu a pandemia e todo parou. Despois da pandemia volvín traballar pero non foi doado atopar sitio, ata que por un contacto chegamos a Cerceda. E teño que agradecer que dende o primeiro momento nos abriron as portas e nos deron todas as facilidades do mundo. Despois de máis de 17 anos como promotor creo que é o momento. Teño a experiencia, os contactos, a capacidade económica e o máis importante as ganas de facer algo diferente na miña cidade.
- 2 – Estella Boersma, Luke Slater, Ellen Allien, Helena Hauff… tremendo cartelazo, os cabezas de cartaz xa estarían todos anunciados ou queda algunha sorpresa ?
Aínda queda algunha sorpresita para o final. Antes de xuño deixaremos todo o line up completo.
- 3 – Aínda que o venres 13 sexa hard tecno e o sábado 14 tecno, terán cabida outros artistas orientados a pinchar outros estilos de electrónica?
Consideramos a posibilidade de engadir outros xéneros ao festival. Xa probamos con outros artistas pero non estaban dispoñibles. Todo dependerá diso, estamos traballando niso.
- 4 – Supoño que recomendarás non perderse a ningún dos artistas confirmados ata o momento, pero habría algún que resaltarías especialmente?
Luke Slater é unha lenda, seguro que nos deixará un peche de festival para o recordo.
- 5 – Dende que a mediados dos anos 90 na Coruña se foi introducindo a electrónica da man de djs coma Ino e Grobas dende o House Café e o Telefunken, foron xurdindo sempre iniciativas ligadas a electrónica na cidade. Entre outras, o 981 festival, Fanzine e mesmo se celebraron dúas edicións do Sonar. Semella que agora con Go! events, Retrofuture, Wake Up Electronic Parties, a sala Pelícano e djs como Barbara Lago, está vivindo unha segunda xuventude a electrónica na Coruña.
A verdade é que para a poboación coruñesa todas as opcións que hai, cada unha diferente, é un escenario envexable e o mellor de todo é que vén xente nova, pegando moi forte e con moitas ganas de facer as cousas ben.
- 6 – Dj dende 1999 e promotor dende 2006. Como e onde foron os inicios de dj?
Como DJ, o meu debut foi na sala Bambina con Jeff Mills aos 15 ou 16 anos, non lembro moi ben. A partir de aí pasei por practicamente todos os clubs de Galicia ata que comecei a organizar os meus propios eventos, o club Soda. O meu primeiro acto foi con Tim Paris e dende aí non parei ata hoxe e as miñas festas pasaron por locais como Green, Bambina, Tresor, Fox, Piramide ata chegar en 2009 ao local de Pantalán.
- 7- O primeiro artista que contrataches ou evento que organizaches?
Tim Paris no club Soda.
- 8 – O garito onde máis ilusión che fixo pinchar?
Fabrik Madrid nunha reverse, no festival Amnesia de Expo Coruña e Freelive de Cerceda.
- 9 – O artista máis difícil de contratar ou o que máis tempo estiveches detrás del?
Ben Sims.
- 10 – Algún artista que non tiveras moitas expectativas sobre el e te sorprendera? e algún que te decepcionase?
Se quero contratar a alguén é porque teño expectativas sobre el e nunca decepciono. Temos que entender que os djs non son máquinas e non é un traballo doado, todos temos días bos e malos pero o que chega añi e a xenteo quere ver, é porque vale.
