Distintas localidades galegas acolleron este martes concentracións, con minutos de silencio, ante institucións para condenar o crime machista da Coruña, no que, presuntamente, un septuaxenario asfixiou á súa muller, de 74 anos, na noite do xoves ao venres.
Foi ante o consistorio coruñés, igual que noutros concellos, pero tamén en delegacións territoriais da Xunta e a sede desta en San Caetano. No acto convocado na praza de María Pita, a subdelegada do Goberno na Coruña, María Rivas, confirmou que segue aberta a investigación con actuacións por parte da Policía Nacional, ante a que o home, que ingresou en prisión por delito de homicidio, sostivo que lla atopou morta.
En declaracións aos medios, noutro acto convocado na cidade e tras participar xunto a edís do consistorio coruñés no minuto de silencio, a rexedora coruñesa, Inés Rey, incidiu en que a cifra de 28 mulleres asasinadas no que vai de ano é un dato “insoportable”. “Non descansaremos ata que a cifra sexa de cero, máxima condena e repulsa á violencia de xénero e a condena aos que a negan e recortan en políticas de igualdade”, sentenciou tamén.
En Santiago de Compostela, a conselleira de Política Social e Igualdade, Fabiola García, e a de Medio Ambiente e Cambio Climático, Ángeless Vázquez, así como outros membros do Goberno galego, participaron nun minuto de silencio ante a sede da Xunta en San Caetano.
A titular de Igualdade reiterou a repulsa do Goberno galego “a calquera tipo de violencia de xénero” e destacou que situacións como esta “constatan que aínda queda moito traballo por facer”. Así mesmo, dirixiuse a todas as mulleres vítimas de violencia de xénero para que denuncien a través dos recursos á súa disposición como o teléfono confidencial e anónimo 016 ou os centros de información á muller.
Ademais, na praza do Obradoiro gardouse tamén un minuto de silencio. Membros da corporación municipal e persoal do Concello de Santiago de Compostela participaron no acto, no que se ha guadado un minuto de silencio en memoria da muller asasinada, mostrando así a súa condena e solidariedade.
