O centro deportivo de O Castrillón abrirá as súas portas ao público este xoves, día 15, segundo anunciou a alcaldesa, Inés Rey, que avanzou que haberá actividades gratuítas ata finais de decembro.
A rexedora realizou este anuncio tras a reunión do consello da empresa municipal Emvsa na que se aprobaron os últimos contratos necesarios para a posta en funcionamento das instalacións municipais.
Emvsa encargarase da xestión de maneira provisional ata que se licite de maneira conxunta coa das instalacións deportivas de San Diego.
A apertura, segundo explicou a alcaldesa, adiantouse debido ao ritmo da fase de preinscrición na que xa se apuntaron 1.961 persoas.
Por outra banda, a partir deste martes, e ata o xoves, día 15, poderase realizar a preinscrición para a nova programación de actividades socioculturais que levarán a cabo en toda a rede de centros cívicos da cidade.
