O Concello da Coruña vai pór en marcha o Programa Municipal Experimental de Atención e Inclusión Social da Soidade non Desexada para atender “a unha ampla porcentaxe da poboación, de todas as idades, que padece un problema cada vez máis expandido”. Así o anunciou a alcaldesa da cidade herculina, Inés Rey, acompañada pola concelleira de Benestar Social, Nereida Canosa, na presentación das liñas xerais desta iniciativa, cuxa execución se materializará en 2026.
A mesma está deseñada para facer fronte á soidade non desexada, “un dos grandes problemas” da sociedade que afecta “a todos os sectores da poboación, persoas maiores, novas, con discapacidade e en situación de desemprego”, apuntou a rexedora. Respecto das cifras, Rey lembrou que en Galicia o 19,8 % da poboación afirma sentirse soa, sendo o 20 % persoas maiores e o 35,5 % mocidade. “Dos maiores que viven sós en Galicia, o 46,7% revelan o seu malestar por esa situación”, concretou.
Por outra banda, o consistorio coruñés publicou o convenio asinado entre os alcaldes e a Comunidade de Propietarios do Polígono de Pocomaco polo que as vías, instalacións e servizos do mesmo pasan a ser de titularidade municipal. Este acordo permite “regular a situación do polígono”, segundo apunta o Concello. O texto, engade, xa está dispoñible na páxina web do a institución onde se poderá consultar integramente ata o próximo 28 de outubro.
