Presentou hoxe a Deputación da Coruña os proxectos escollidos dos VI Premios Luísa Villalta, convocados pola área de igualdade da Deputación da Coruña. 8 propostas, das 34 presentadas, de toda a provincia foron as escollidas, e que recibirán 12.500 euros cada unha delas para facelos realidade.
Tres teñen de acento “coruño”.
”Non calarás”, da Alexandre Bóveda
Baseado na iniciativa A Coruña das Mulleres, A Agrupación Cultural Alexandre Bóveda propón este proxecto “Non calarás”, un proxecto con carñacter histórico, que recolle parte dos conflitos laborais vividos principalmente no século XX protagonizados por mulleres. Un traballo de recuperación da memoria das mulleres baseado no traballo e a rebeldía, que abarca diversos ámbitos de traballo (investigación, divulgación, exposición, publicación e rutas). Céntrase na cidade da Coruña, sendo un proxecto inspirador para outras vilas e cidades do territorio. Destaca a coordinación co tecido asociativo e educativo.
‘Ofuscadas polo vicio da razón’, de Yarama África
A combativa tenda e espazo cultural africano da Rúa Entrepeñas lanza este proxecto para crear un espazo seguro de encontro e expresión artística para mulleres migrantes e refuxiadas na provincia da Coruña en coordinación co ámbito cultural. Inspírase na propia obra de Luísa Villalta. Ten previsto realizar distintas actividades de lectura, escritura, eventos artísticos, etc. É un proxecto cun alto potencial de replicabilidade, xa que a súa metodoloxía é facilmente adaptable a outros contextos.
‘Punto en boca. Costura e teatro’, de Raquel García Crespo
A actriz, natural de Culleredo, desenvolverá este proxecto de creación escénica e investigación que ten como base o oficio da costura como tradición, herdanza xeracional e medio de vida, e como tal, moi asentado nun territorio no que o oficio da costura marcou a vida de moitas mulleres da provincia. Utilizan o pasado e a tradición para entender a actualidade e mirar ao futuro. É un proxecto moi participado e colaborado por diferentes axentes do territorio e as propias protagonistas.
O resto de proxectos que se poderán realizar coa axuda destes premios son “O próximo baile”, será comigo’, de Sabela Losada Cortizas (Santiago); ‘Altas luces’, de Illa Bufarda (Santiago); ‘A historia vaxenial’, de Artyc Content (Ferrol); ‘As mulleres no xornalismo Galego: a crónica revelada’, do Colexio Profesional de Xornalistas de Galicia; e ‘A clase’, de Mala Herba Producións (Brión).
