A Plataforma Contratos Públicos de Galicia publica este mércores a resolución da adxudicación do contrato do servizo público de transporte regular de viaxeiros por estrada XG635 –A Coruña-Lugo-A Mariña, cos anexos–, que recaeu na empresa Autos Carballo, (AUCASA) mercada polo Grupo Arriva en 2016. Trátase dun contrato cun importe de 4 millóns de euros.

Alerta de oligopolio

Se ben esta ruta xa a tiña Arriva, “o monopolio é un feito”, sinalan dende o sector. “En Galicia van quedar tres empresas funcionando (Alsa, ⁠Monbus e ⁠Arriva), e despois o problema vaino soportar a sociedade, bueno xa o está soportando porque non hai empresas para realizar as viaxes necesarias para mover o país”.

Todo, afirman fontes do sector, polo interese principal da administración de ter un “interlocutor único”, algo que leva permitindo a sociedade na última década sen protestar.

O servizo

Os novos servizos comezarán a funcionar a inicios do próximo ano, mantendo os servizos actuais e reforzando a conexión directa entre A Coruña e Lugo cun incremento de tres autobuses de máis de 55 prazas.

De luns a venres haberá, a maiores dos que xa funcionan, oito novos servizos de ida e outros tantos de volta, asegurando así un servizo cada hora por sentido entre as 6,30 e as 21,15 horas. Os sábados súmanse dous servizos de ida e dúas de volta, e os domingos e festivos prestarase un servizo máis en cada sentido.

A implantación do servizo directo supón un aumento porcentual do 25% e sumará 4.320 expedicións anuais, coa previsión de chegar a preto de 460.000 viaxeiros ao ano en 2025.

A maiores destas cidades, este servizo de explotación, cuxa vixencia se prevé estender ata 2030, inclúe os concellos coruñeses de Aranga, Arteixo, As Pontes de García Rodríguez, Bergondo, Betanzos, Cedeira, Cerdido, Coirós, Ferrol, Mañón, Moeche, Narón, Neda, Oleiros, Ortigueira, Sada e San Sadurniño, así como os lugueses da Pastoriza, A Pontenova, Abadín, Barreiros, Begonte, Burela, Castro de Rei, Cervo, Foz, Guitiriz, Lourenzá, Meira, Mondoñedo, Muras, O Vicedo, Ourol, Outeiro de Rei, Pol, Rábade, Ribadeo, Riotorto, Trabada, Vilalba, Viveiro, Xermade e Xove. Dado o seu tránsito polo límite autonómico entre Galicia e Asturias, inclúense tamén paradas en San Tirso de Abres e Vegadeo.

Segundo os datos rexistrados en 2023, a demanda real neste case medio centenar de concellos aproxímase aos 371.500 viaxeiros ao ano, polo que a nova concesión impulsará os servizos con cinco vehículos máis, alcanzando os 22 autobuses, e a contratación doutros tantos condutores, ademais dos previstos para reforzar as conexións entre A Coruña e Lugo.