Por segundo ano e de xeito coordinado a Federación de asociacións culturais galegas Galiza Cultura organiza en distintas vilas do país a lectura pública de ‘Un ollo de vidro. Memorias dun esquelete’, publicada en 1922 pola Editorial Céltiga de Ferrol.
Unha obra curta na que un esqueleto narra as súas peripecias dunha existencia máis aló da morte.
Unha lectura teatralizada, diversas lecturas públicas, foliadas, magostos, sorteos de libros, ruadas, baleirado de cabazas e mesmo unha queimada son as distintas actividades que ao longo do país van celebrar o Samaín e a data dos defuntos e das defuntas tomando como punto de partida a obra de Castelao.
Deste xeito, os actos dan comezo na cidade da Coruña, o xoves día 31, a partir das 19.30 horas. Nesta cita realizarase unha lectura teatralizada no Paraninfo da Universidade na rúa Maestranza. Sobre o escenario, e mediante a sucesión das intervencións dun elenco de actores e actrices caracterizados, desvelaremos cales son esas memorias, as vivencias que existen no máis alá e como, quizais, a morte se asemella demasiado á vida. E se o ano pasado, nesta actividade participaban as entidades Agrupación Cultural Alexandre Bóveda, a Asociación Veciñal, Cultural, Deportiva e Recreativa Agra, a Agrupación Cultural Tempo Novo e a Asociación Cultural O Facho, desta volta súmase tamén a Asociación Cultural Libre de Paderne Roxín Roxal.
Para rematar, un magosto baixará o pano a esta actividade ‘arrepiante’ co que se celebrará na cidade herculina a chegada do Día de Defuntos e Defuntas tan arraigado na nosa cultura popular.
Tamén haberá lecturas en O Carballiño, Ourense, Ferrol ou Gondomar.
A actividade realizase grazas ao programa FO203 de subvencións a entidades sen fins de lucro para a realización de actividades culturais durante o ano 2024 da Área Cultura da Deputación da Coruña.
