Cada vez son máis as persoas privadas de liberdade que cumplen a última parte da súa condena no Centro de Inserción Social da Coruña, que se animan a participar como voluntari@s no proxecto Entre Crebas. En boa parte, gracias á implicación e emoción das xentes da Asociación Mar de Fábula, que conseguen trasmitirlles a importancia de participar en accións comunitarias, de axudar, de reforzar a súa autoestima, de sentirse parte da sociedade, e de concienciar e concienciarse co medio ambiente, a través dunha cousa tan real como limpar unha praia.
É impactante ver como unha acción tan concreta consegue xerar tanta empatía nestas persoas que, en moitos casos, perderon a fe nunha sociedade que consideran allea, mesmo inimiga. Con estas limpezas decátanse de que a sociedade tamén os necesita, xerando un espazo de reconciliación moi importante para unha exitosa reinserción social, e fomentando un menor risco de recaída nas drogas e/ou na delincuencia.
Esta semana o proxecto cumplía a súa 11ª limpeza voluntaria da praia do Areal da Torre, coñecida nos últimos tempos como As Lapas, situada xusto en fronte do CIS, e que pasa por ser un dos espazos nos que as persoas en réxime de semiliberdade pasan moitas das horas de lecer das que dispoñen cada semana.
Unhas limpezas que forma parte do proxecto Entre Crebas, pois a entidade medioambiental é especialista en aproveitar os residuos plásticos que botamos a sociedade e que devolve o mar en arte a través da reciclaxe.
Participaron desta volta na limpeza 17 persoas residentes no CIS, 2 funcionarias e 2 voluntarios da asociación. Todas meteron unha man para aliviar a contaminación do mar que segue enchendo de plástico as nosas zonas naturais.
Recolleron case 600 residuos, entre eles 75 anacos de plásticos pequenos, 330 anaquiños de vidro, 20 toalliñas húmidas, 40 anacos textís, 91 cabichas, un dos grandes inimigos a combater a base de campañas de concienciación, e ata un fouciño enferruxado.
Foi esta a penúltima limpeza desta edición do proxecto, que o vindeiro mes de decembro terá no centro unha especial celebración de peche, pensando sempre en reanudar o exitoso proxecto a comezos do ano que vén.
Máis novas
O Voluntariado de Mar de Fábula deixou un pouco máis limpo o areal de Barrañán
