A Coruña acollerá desde este venres, día 22, e ata o 1 de decembro, a XX edición do Concurso de Tapas Picado. Este ano coincide co 150 aniversario do nacemento de Manuel María Puga e Parga ‘Picadillo’, escritor, gastrónomo e político que dá nome ao certame.
Segundo explicaron os organizadores durante a presentación do evento, o público poderá degustar un total de 18 tapas creativas e 34 tapas receitario. Cun total de 52 propostas, 19 serán aptas para persoas celíacas e 7 para veganas. Todas elas “deberán ser orixinais e estar preparadas de maneira artesanal e con produtos de quilómetro cero ou de orixe galega”, concretaron, e o prezo de cada unha “oscilará entre o tres e o catro euros”.
“Con iniciativas como esta A Coruña reforza o seu posicionamento como destino gastronómico pero tamén mostra parte da súa cultura de lecer a través do ‘tapeo’, unha actividade social que crea unha rede entre os residentes e visitantes á nosa cidade, á vez que dinamiza o sector hostaleiro, tal e como leva facendo este goberno municipal durante os últimos anos”, destacou a alcaldesa da cidade herculina, Inés Rei, durante o acto.
Ao mesmo asistiron tamén a delegada na Coruña da Asociación de Celíacos de Galicia, Lida Filgueira; o director de negocios de Cash Record, Fran Crespo; e a neta de ‘Picadillo’ e membro do xurado do concurso, Chau Fernández Gago e Puga.
Podes descubrir aquí as tapas e as rutas.
O Día do Libro celébrase co 150 aniversario de Picadillo, o gran supervendas da cociña
