A Coruña acollerá os días 1, 14 e 15 de decembro, no Teatro Rosalía de Castro, o Ciclo de Coros Galegos, unha iniciativa presentada nun acto con presenza do concelleiro de Cultura e Turismo, Gonzalo Castro.
Esta iniciativa ten como obxectivo a visibilización de colectivos que, como Cantigas da Terra, tratan de recuperar, preservar e divulgar o folclore galego en calquera das súas expresións.
“Incluíndo formatos tan importantes para o folclore como os cuartetos tradicionais e os grupos de baile, que dan conta da riqueza da cultura oral galega”, subliñaron os seus promotores.
Nos concertos programados no Teatro Rosalía, o público poderá escoitar os coros Cantigas e Agarimos e a Coral de Ruada. Ademais, participará o cuarteto Ansuíña e o grupo Rebulir.
