Despois de 9 anos á fronte dun extenso equipo de profesionais voluntarios, o fotodocumentalista Xosé Abad, impulsor e coordinador da Rede Acampa pola Paz e o Dereito a Refuxio na cidade da Coruña, vén de ceder o relevo para poder retomar as súas responsabilidades profesionais e persoais ao cen por cento.
A asemblea xeral da asociación, que ten consolidado os seus Encontros como un referente internacional no campo da defensa dos DDHH e do xornalismo humanitario, aprobou esta mañá de sábado 25 de xaneiro de 2025 a renovación da súa xunta directiva, pasando a facerse cargo da coordinación xeral da mesma a filóloga e docente especializada no traballo con colectivos vulnerables, Estela López.
O equipo ao fronte de Acampa queda conformado por Roi Abad, na vicepresidencia, Rubén Sánchez Imizcoz, a cargo da tesourería, Tamara Rademacher na secretaría e Hortensia Rossi como vogal responsable de organizacións.
Agradecemento ao traballo voluntario que puso en pé Acampa
Xosé Abad comezou o seu discurso de despedida lembrando a Carlos Reguera, membro fundacional de Acampa recentemente falecido que ocupou a secretaría da organización desde os seus inicios. Agradeceu o traballo de todas aquelas persoas voluntarias que pasaron polos distintos equipos de traballo de Acampa pola Paz dando o mellor de si mesmas, de maneira xenerosa e intensa, e en especial ao equipo de coordinación, tamén, sempre de carácter voluntario. Tamén puxo en valor a contribución das organizacións máis activas da rede e o seu compromiso nos actos promovidos en cada Encontro Internacional.
Abad, alma mater de Acampa pola Paz, dá agora un paso atrás confiado en que o proxecto está consolidado e a súa continuidade garantida. “Afortunadamente, ninguén é imprescindible e temos un equipo con moitas ganas de abordar os retos pendentes, que non son poucos”, indicou. “Creo no futuro desta aposta e do movemento que xera, xa que en poucos anos e partindo de cero, alcanzou un gran prestixio dentro e fóra das nosas fronteiras, logrando contaxiar a persoas de moitas outras cidades” explicou o fotodocumentalista, resaltando a rede Acampa pola Paz conformada en Brasil desde as 2019 grazas ao compromiso do equipo que coordina a Profesora Doutora Célia Regina Rossi.
O coordinador saínte non quixo deixar pasar por alto o seu agradecemento persoal aos case sesenta fotógrafos e fotógrafas de primeiro nivel que, ano tras ano, encheron as rúas da cidade con historias e imaxes que a ninguén deixaron indiferente, exposicións que en cada edición foron vistas por un cuarto de millón de persoas.
Tamén fixo mención aos principais relatores e relatoras nacionais e internacionais que, ano tras ano, trouxeron ata os xardíns coruñeses os seus relatos directos sobre o que acontece na cara B do mundo: guerras, conflitos, desastres naturais, espolios, secas, fames negras… axudando ao público asistente aos Encontros a entendelos e a fortalecer o seu pensamento crítico.
Manter a esencia de Acampa
“Debemos resistir tamén a tentación de converter Acampa no que non é, tratando de substituír a partidos, sindicatos ou movementos que convocan accións de resposta social na rúa, tan necesarias; pero sen deixar de ser o vínculo de unión que apoia, acompaña, e amplifica aquelas accións encamiñadas á defensa dos DDHH”.
Así mesmo, convidouse a organizacións e socios a propoñer candidaturas ao que será o Recoñecemento Acampa á Defensa dos DDHH 2025. O prazo estará aberto ata o 31 de xaneiro. As bases reguladoras e o formulario poden consultarse na web de Acampa pola Paz: www.redeacampa.org
O novo equipo resultante da asemblea de hoxe comeza xa a programar o que será o IX Encontro Internacional Acampa pola Paz centrado no “Dereito á paz” e que se celebrará os días 20, 21 e 22 de xuño.
