O portavoz do grupo do Partido Popular na Deputación da Coruña, Evaristo Ben, esixiu ao presidente provincia, Valentín González Formoso, que “abandone a demagoxia e o postureo” respecto dos investimentos para modernizar a liña ferroviaria entre Ferrol e A Coruña.
Así o fixeron este domingo nun comunicado despois de que o presidente provincial reclamase ao secretario de Estado de Transportes e Mobilidade, José Antonio Santano, que o Goberno central debía axilizar os investimentos para a modernización desta liña de tren.
“Formoso coñece mellor que ninguén que o Goberno central do seu partido non ten absolutamente nada planificado para poder realizar as actuacións necesarias que está a reclamar”, sinalou Ben, á vez que acusou ao presidente da Deputación de ser “cómplice no seu intento de tapar as vergoñas” do Executivo central.
Por iso, Ben remarcou que Formoso debe “abandonar os actos de fe” e esixir que, “dunha vez por todas”, as administracións galegas teñan na súa poder o Plan Director do Corredor Atlántico que debe rexer esas actuacións.
