Persoal do Hospital Marítimo de Oza, dependente do Complexo Hospitalario Universitario da Coruña (CHUAC), denuncia os problemas de filtracións que presenta o edificio dende hai anos e que provoca a presenza constante de goteiras durante os meses de chuvias.
Segundo explican os profesionais, “o problema afecta á estrutura anexa ao edificio principal, na que se sitúa a área de rehabilitación e fisioterapia. Este inmoble ten un tellado plano, a xeito de azotea, onde durante o inverno, entre novembro e marzo ou abril, se acumula a auga da chuvia, formando unha auténtica piscina. Esta auga posteriormente fíltrase a través da estrutura de formigón, que presenta problemas de illamento e de impermeabilización”.
A auga cae en forma de goteiras dentro das áreas de traballo de fisioterapia, nas zonas de consulta e xestión, as zonas de tránsito dos pacientes e a sala de espera. As acumulacións de auga no teito mesmo produciron o desprendemento dun panel interior do teito da sala de espera, que caeu ao chan sen producir danos persoais, grazas a que a área en risco estaba previamente sinalizada.
Estes problemas afectan sobre todo ás consultas de fisioterapia e á área de tratamento, que durante os meses de inverno están cubertas de sabas, empapadores e cubos de auga, coas consecuentes incomodidades para persoal e pacientes. En ocasións, as consultas e tratamentos deben desprazarse a outras localizacións e, de igual xeito, doentes e traballadores deben evitar os cubos colocados no chan para recoller a auga das pingueiras.
“Non é agradable traballar desta maneira e tampouco resulta cómodo para os pacientes, que por exemplo deben esquivar os cubos colocados para recoller a auga que se filtra”, explican os facultativos. “É unicamente grazas ao esforzo do persoal e á nosa boa fe que estas eivas non teñen maiores consecuencias, porque non nos importa ir movéndonos a outras localizacións, pois doutro xeito os pacientes quedarían sen atención”.
“O persoal que sufrimos esta situación estamos cansos, estamos fartos”, sentenzan. “Cada vez que protestamos veñen arranxar o teito, pero son só parches. Esiximos da Xerencia da Área Sanitaria unha solución permanente ao problema que sufrimos”.
Responsabilidades
A situación leva anos sendo advertida ante Veolia, empresa á que está subcontratada o mantemento das instalacións. Porén, o único que os traballadores de Veolia poden facer son actuacións puntuais para limitar os efectos das pingueiras.
Hai dous anos tamén comunicamos a situación ante a Xerencia do Hospital, que de inmediato enviou un servizo de mantemento que se encargou de lixar e pintar e quitar os cubos. Pero este tipo de actuacións son, unicamente, parches que non solucionan o problema.
