Redrum Teatro estrea o vindeiro 23 de maio no Teatro Colón Sophie non é o meu nome de guerra, obra escrita por Roberto Pascual galardoada en 2021 co Premio Rafael Dieste de textos teatrais que convoca a Deputación da Coruña.
Redrum, que xa iniciou os ensaios en Ribadavia grazas á colaboración do Concello, conta con Laura Míguez para a dirección desta obra, ópera prima como dramaturgo de Roberto Pascual, investigador teatral, profesor na Escola Superior de Arte Dramática de Galicia e director da Mostra de Ribadavia entre 2009 e 2024. As actrices Alixa Ladson e Camille Hedouin protagonizan a montaxe.
En Sophie non é o meu nome de guerra, Redrum Teatro traza dende as táboas unha viaxe emocional e xeográfica entre Camerún e A Coruña. Nela, o público presenciará un duro periplo vital na que a protagonista, Sophie, sofre a violencia da trata de mulleres, das restritivas políticas migratorias europeas e da hostilidade social que agroma nos países de acollida, tanto a que vén dada pola animosidade institucional como pola invisibilidade que arrodea as mulleres migrantes. Malia toda esta dureza, Sophie non é o meu nome de guerra é un relato que abre as portas á esperanza.
Porque a historia de Sophie, que está baseada en feitos reais, é moito máis ca historia dunha vítima, é a historia dunha muller que ama e quere ser amada, divertida vital, que desexa e que procura, como calquera outra persoa -migrante ou non- a oportunidade dun futuro mellor. Ao longo da obra, dividida en doce cadros, coñecemos a orixe da protagonista na súa natal Yaoundé, capital de Camerún, as súas lembranzas da infancia e a riqueza da cultura popular de África antes de achegarnos ao seu éxodo, que a levou por Malí e Alxeria para despois chegar a Melilla, Valencia, Francia e, ao final, á Coruña.
A compañía
Redrum Teatro é unha empresa cultural dedicada á produción e distribución de espectáculos teatrais e á edición de libros infantís constituída en 2009. Dende a súa creación hai xa dezaseis anos, Redrum Teatro levou a escena unha vintena de espectáculo. Entre as súas montaxes, destacan títulos como A pensión, A canción do elefante, Invisibles, O mozo da última fila, Hamelin ou O pequeno poni. No ámbito das montaxes para o público infantil, cómpre destacar espectáculos como A nena que quería navegar, Contos do recreo, Roedores ou, máis recentemente, Os contos do Lobicán, espectáculo estreado a finais de 2024 e candidato aos Premios María Casares como mellor espectáculo de monicreques.
Belén Regueira polo Día Mundial do Teatro: “Somos axentes fiscalizadores críticos do poder”
