Luns poético o que viviu a cidade onte, pola mañá no IES Rafael Dieste, e pola tarde no Ágora, nunha xornada no que a lusofonía foi protagonista.
Ondjaki no IES Rafael Dieste
O instituto coruñés vestiuse de festa para recibir a Ondjaki, un dos escritores africanos de maior suceso internacional e gañador dalgúns dos máis prestixiosos premios literarios internacionais como o Jabuti do Brasil, o Littérature-Monde de Francia, ou o José Saramago de Portugal.
Ndalu de Almeida, coñecido no mundo literario como Ondjaki, que significa ‘guerreiro’ na lingua mbundu, é natural de Luanda, en Angola, é doutoramento en Estudos Africanos. Narrador, é tamén escritor para cinema, ademais de compaxinar esta actividade como poeta.
Mantivo un encontro co alumnado de 3º ESO do centro. A súa presenza no centro supuxo o acto inaugural e de presentación dunha semana cultural que o Dieste dedicará, entre o 7 e o 11 de abril, ao universo lusófono, con convidados internacionais e presenza de actividades relacionadas cos pobos que comparten medula lingüística co galego, caso do Brasil, Angola, Brasil, Cabo Verde, Goa, Guiné-Bissau, Guiné Equatorial, a chinesa Macau, Moçambique, Portugal, São Tomé e Príncipe ou de Timor-Leste.
O autor angolano foi presentado por Julieta Pérez Luna, alumna neofalante nacida na Arxentina e de 14 anos, coa que conversou sobre temas relacionados coa súa novela “Bom dia, camaradas”, así como a respecto de aspectos como a historia, a colonización, o sistema escolar angolano ou a lingua mbundu, que -como Ondjaki- falan outros catro millóns de persoas.
Recitais, espectáculos de capoeira, concertos, encontros con alumnado de portugués e outras actividades recollerán, a partir do próximo luns, o testemuño deste primeiro acto.
Ondjaki e Sechu Sende no Poetas Di(n)versos
Pola tarde, o ciclo Poetas Di(n)versos uniu no Ágora a poesía de Ondjaki coa galaica do padronés Séchu Sende, nun encontro presentado por Yolanda Castaño que podedes ver aquí.
