A Xunta axilizará “ao máximo” os trámites que lle corresponden co fin de facilitar que o Concello da Coruña “execute canto antes” o novo centro de saúde en Santa Lucía.
Así llo trasladou o conselleiro de Sanidade, Antonio Gómez Caamaño, a representantes da Asociación de Veciños e Comerciantes da Falperra cos que se reuniu esta tarde, xunto á delegada territorial da Xunta na Coruña, Belén do Campo, e o xerente da área sanitaria, Luís Verde.
Unha obra que leva máis de dúas décadas de demandas, vinculada á reforma dun mercado que volveu ser anunciada en febreiro de 2023, pero da que non houbo ningún avance nestes dous últimos anos, máis alá da elección do proxecto en maio de 2023.
No encontro, celebrado na delegación territorial da Xunta, en resposta a unha solicitude da asociación, Gómez Caamaño explicou que o Sergas espera polas últimas correccións técnicas ao proxecto que lle corresponde elaborar ao Concello.
O conselleiro manifestou o compromiso de emitir “coa máxima dilixencia” o informe de conformidade en canto dispoña do novo documento. Ademais, asegurou que, unha vez que o proxecto estea aprobado, a vontade da Xunta é tamén “tramitar de forma rápida o convenio co Concello para o financiamento das obras”.
Máis novas
A reforma do Mercado de Santa Lucía volve poñerse en marcha tras dúas décadas de espera
