Mañá será a Plataforma Defensa do Común o que lance expoña diversos aspectos do documento oficial do Plan Coruña Marítima “que permanecen silenciados, pero que resultan claves para poder formarse unha opinión razonada sobre unha cuestión tan trascendental para o futuro da cidade e, principalmente, para sectores básicos como a pesca”.
Pero hoxe foi o BNG o que, a apenas 4 días do remate do prazo para a presentación de alegacións, e despois de varias xornadas abertas de baixa participación (semella que os centros cívicos dos barrios son espazos máis accesibles á sociedade que o Palexco), expón as súas achegas.
O BNG principalmente demanda a superación dos convenios de 2004, principalmente aceptando a condonación da débeda contraída por mor da construción de Punta Langosteira así como o mantemento da titularidade pública dos terreos da dársena interior que se vexan desafectados de usos portuarios. Así o explicaba Francisco Jorquera en rolda de prensa esta mañá, pedindo que estas ideas sexan incorporadas ao documento inicial de Bases Estratéxicas para o desenvolvemento do Proxecto Coruña Marítima.
O grupo considera que o Plan inicial inclúe “ambigüidades e contradicións” que “atinxen a aspectos chaves como a titularidade dos terreos obxecto da intervención e o financiamento da súa transformación”.
“A contradición é evidente cando por unha banda (páxina 11 do documento de bases estratéxicas) se fala do “interese común en manter a titularidade pública dos espazos” e, por outra (páxina 26), se consigna a necesidade de “analizar e atender os compromisos e acordos dos convenios subscritos en vigor para a financiación da construción do porto exterior, xunto co financiamento da débeda da Autoridade Portuaria, mediante a obtención dos aproveitamentos urbanísticos necesarios”.
A xuízo do BNG, a mellor garantía de que os “espazos” manteñan a titularidade pública pasa por “dar por definitivamente por superados” os convenios de 2004, como xa respaldou o pleno en varias ocasións, pois son estes os que contemplan “a obtención dos aproveitamentos urbanísticos necesarios” (isto é, a venda de activos, de terreos, a súa privatización) para facer fronte á débeda da Autoridade Portuaria.
“Volvemos lembrar que o Goberno central condonou a débeda do Consorcio València 2007 por un importe moi superior á débeda do porto da Coruña”, dixo o portavoz nacionalista.
Cunha particularidade: a débeda de València foi contraída para adecuar o porto a actividades que nada tiñan a ver coa actividade portuaria, en tanto que “no caso da Coruña foi para financiar a construción do porto de Punta Langosteira, froito dun acordo que se presentou como unha decisión de Estado para compensar Galiza das consecuencias da catástrofe do Prestige”.
Un consorcio
O BNG propón a constitución dun Consorcio coa participación das distintas administracións públicas, de modo a impulsar e xestionar o proxecto Coruña Marítima.
Ademais, sobre o concurso convocado para o desenvolvemento do Master Plan, o BNG expresa as súas reservas por se ter apostado por un concurso por procedemento restrinxido, “polo perigo de que se limite a posibilidade de expertos locais concursaren en igualdade de condicións”. “Cremos que é necesario aproveitar e poñer en valor o coñecemento existente na Coruña e na Galiza”, acrecentou.
Novos equipamentos e vivenda
Sobre a hipótese de instalación de novos equipamentos nos espazos portuarios desafectados, o BNG é claro partidario de lle dar prioridade a aqueles de carácter público “que permitan corrixir os déficits existentes”.
O BNG considera que entre as prioridades non se encontra a da creación dun grande recinto multiusos, “pois A Coruña xa conta con instalacións deste tipo, necesitadas en moitos casos de actuacións de mantemento e mellora”.
Canto a usos residenciais, Jorquera enfatizou que o BNG non ve como prioridade a construción de vivenda na nova fronte marítima: “Xa existen novos desenvolvementos urbanos previstos e o que cómpre é completar o tecido urbano consolidade, apostando por un modelo de cidade compacta”.
En todo caso, deixa aberta a porta á creación de vivenda, e nese caso, defende que se asegure o mantemento da titularidade pública dos terreos (vivenda pública), se combinen os usos residencias con outros usos, se evite o efecto illa -coa creación de ámbitos desconectados do resto da cidade-e se impida tamén densidades excesivas ou a aparición dun gueto para persoas de alto poder adquisitivo.
Máis novas do Coruña Marítima
Baixa, pero insistente, participación veciñal no primeiro taller temático sobre Coruña Marítima
“Co Master Plan Coruña Marítima enfróntamos a unhas propostas anacrónicas”
