Semana chea de participación cidadá na Coruña. Pero se ben houbo gran participación no primeiro dos encontros por barrios sobre a nova rede de bus urbano, onte desenvolvíase no Palexco, cunha menor afluencia, o primeiro taller temático aberto no marco do deseño do futuro da fachada marítima da cidade.

Unha trintena de persoas, a maioría a título individual, (foron invitadas máis de 900 entidades…) participaba neste primeiro acto dedicado á “Economía e Innovación”, convocada pola Comisión Coruña Marítima (integrada polo Concello da Coruña, Xunta de Galicia, Ministerio de Transportes y Movilidad Sostenible, Puertos del Estado, ADIF e a Autoridade Portuaria), para abrir o debate de tan trascendental proxecto urbanístico.

Participaron como invitados expertos da Universidade da Coruña, a Confederación de Empresarios, Cámara de Comercio, o Instituto Tecnolóxico de Galicia e representantes dos polígonos industriais, entre outros. Pola UDC, asistiu o vicerreitor de Economía e Planificación Estratéxica, Ángel Fernández, a catedrática e investigadora da Facultade de Informática Susana Ladra e o concelleiro de Economía e Planificación Estratéxica, José Manuel Lage.

Dende a Comisión deixaron clara a necesaria inversión privada e non quixeron abordar a polémica da débeda, a pesar da insistencia en solicitar a condonación que volveron propoñer representantes de Defensa do Común e Ergosfera, as entidades máis implicadas neste proceso de reurbanización tan transcendental. Así, reiteraron a importancia de afrontar canto antes este debate, pois a condonación que permitiría manter a titularidade pública do solo e evitaría o proceso de especulación coa vivenda.

Tamén houbo participación do sector produtivo, que deixou clara a necesidade de que o porto siga sendo un porto eminentemente pesqueiro.

Máis talleres abertos

• O seguinte taller será o mércores 26 de marzo, no centro Hi Coruña, ás 17 horas,
  e abordará a temática “Mobilidade e transporte”.
• Despois, os días 1, 2 e 3 de abril, tamén ás 17:00 horas, nestes casos no Palexco, terán lugar os últimos talleres, que tratarán sobre as seguintes áreas: “Equipamento e Usos” (1 de abril), “Actividade Portuaria” (2 de abril) e “Ecoloxía, Medio Ambiente, Auga e Enerxía” (3 de abril).

Máis novas

Gran interese no primeiro encontro participativo para deseñar a nova rede de bus urbano en Mesoiro

A Comisión Coruña Marítima invita á cidadanía a participar en 5 talleres formativos abertos