O Concello da Coruña solicitou á Xunta a declaración de zona de mercado residencial tensionado na cidade como medida, segundo expuxo a alcaldesa, Inés Rey, para facer fronte á subida do custo de pisos. O plan de actuacións formulado polo goberno local establece como obxectivo a 20 anos sumar 13.024 novas vivendas públicas.
“Buscamos reforzar o paquete de accións que temos xa en marcha para facerlle fronte á subida dos custos da vivenda no termo municipal, que están a dificultar o acceso a esta a moitas coruñesas e coruñeses”, expuxo a rexedora.
A adopción desta medida aprobouse este venres na Xunta de Goberno Local, despois de que os estudos técnicos encargados polo Concello constatasen que A Coruña cumpre cos dous criterios específicos que marca a Lei para poder solicitar a declaración.
“O primeiro, que o custo da hipoteca ou aluguer e os gastos derivados da vivenda superen o 30% da renda media dos fogares e, o segundo, que o prezo da compra ou do aluguer experimentase, no últimos cinco anos, un crecemento un 3% superior ao do IPC”, especificou o edil de Urbanismo, Rehabilitación e Vivenda, Francisco Díaz Galego.
Ademais, indicou que na Coruña se dan ambos os criterios nun 50% dos distritos e nun 70% das seccións censales. A Coruña conta, a día de hoxe, cun parque residencial de 873 vivendas públicas, das que 450 son municipais e 423 autonómicas, un dato no que demandou á Xunta maior investimento nesta materia.
Díaz Galego expuxo tamén que a cidade ten un parque de vivenda pública de 0,35 vivendas por cada 100 habitantes. A media española é de 1,3, e a media europea de 3,2. “Estamos, pois, moi lonxe das necesidades reais da cidade, para chegar á media europea necesitariamos 7.200 vivendas máis, pero nos últimos 15 anos a Xunta só edificou 40”, lamentou.
