Ibrahima Diack e Magatte NDiaye, os dous senegaleses que acudiron a tratar de salvar a vida de Samuel Luiz — falecido tras unha malleira mortal no paseo marítimo coruñés — ; Proxecto Home; ‘La Voz de Galicia’, Arroupa-Moda Re e o Centro Dramático Galego son os gañadores dos Premios Solidarios Grupo Social ONCE Galicia 2025.
Estes premios Solidarios son a máxima distinción que concede o Grupo Social ONCE a nivel autonómico, “cuxo obxectivo é recoñecer ás persoas físicas ou xurídicas que destaquen polo seu labor solidario na súa contorna de influencia“, informa.
Na categoría de Persoa Física, son para Ibrahima Diack e Magatte NDiaye. No apartado de Institución, Organización, Entidade, ONG, o galardón é para Proxecto Home. O Premio Solidarios na categoría de Programa, Artigo ou Proxecto de Comunicación é para a reportaxe de ‘La Voz de Galicia’ titulado ‘Os campións de Ortigueira fan teatro: O País das Marabillas’, elaborado por Ana F. Cuba.
Na categoría de Empresa é para Arroupa-Moda Re, proxecto promovido por Cáritas que se centra na recollida, reutilización e reciclaxe de roupa usada. Finalmente, o Premio Solidarios da categoría de Estamento da Administración Pública é para o Centro Dramático Galego. Os premios entregaranse o 5 de xuño, nunha gala no Teatro Colón.
