A Xunta incorporou á súa rede pública de residencias para maiores un novo centro na Coruña, equipado e financiado pola Fundación Amancio Ortega e situado no barrio de Eirís. En total, conta con 150 prazas nunha xestión que estará externalizada. Foi nun acto con presenza do titular do Executivo galego, Alfonso Rueda; a presidenta da Fundación Amancio Ortega, Flora Pérez; da conselleira de Política Social, Fabiola García, e da alcaldesa da Coruña, Inés Rey, ademais de José Arnau, como membro tamén da Fundación Amancio Ortega.
Trátase da cuarta das sete que financia e equipa esta entidade, segundo precisou este último que subliñou que o obxectivo é polas ao servizo coa maior rapidez posible pero garantindo unha calidade “óptima”. Das postas en marcha xa, dixo que esta é a que conta cunha maior superficie, 12.000 metros cadrados, cun investimento de case 32 millóns. Por outra banda, lembrou que na Coruña acometeron xa o centro Pai Rubinos e a Escola Sardiñeira. Só nesta urbe cifrou o investimento en 80 millóns, algo máis de 200 millóns na área metropolitana.
Á súa vez, o presidente da Xunta, Alfonso Rueda, subliñou que se trata dunha nova residencia que entrega a Fundación para a rede pública e nun “emprazamento privilexiado”, apuntou. Por outra banda, incidiu en que a de Pontevedra prevese que se poida pór a funcionar ao longo deste mes e lembrou que empezou a de Ourense, mentres que definiu como “avanzada” a actuación na de Pontevedra. “Agardamos facer a de Vigo”, dixo desvinculando que non se acometa por agora á propia Fundación ou á Xunta.
Mentres, resaltou o número de prazas nesta residencia de Eirís, un total de 150. “Seguimos aumentando prazas”, remarcou en alusión ao obxectivo na comunidade autónoma galega e para aludir, tamén, ás actuacións para mellorar a vida dos máis maiores. A alcaldesa da Coruña, Inés Rey, reivindicou a colaboración público-privada e resaltou o papel de “institucións comprometidas” como a Fundación Amancio Ortega. Tamén incidiu na necesidade de “prestar atención” aos maiores. “Un espazo acolledor, exemplo de sensibilidade na arquitectura”, destacou sobre os materiais empregados.
