O Concello de Oleiros solicitou á Xunta que retire autorizacións outorgadas a vivendas de uso turístico “por non axustarse ao Plan Xeral de Urbanismo”.

“Nin contar con licenza municipal para esa actividade”, sinala nun comunicado no que estima que son unhas 80 as vivendas que foron autorizadas pola Xunta. Respecto diso, indica que o Plan Xeral “define perfectamente as zonas de uso residencial e as de uso hoteleiro polo que os pisos convencionais dedicados a residencia non poden explotarse comercialmente como servizo de hospedaxe”.

Na actualidade, o Concello ten abertos varios expedientes sancionadores a vivendas “que exercen ilegalmente a actividade de hospedaxe, reservada ás empresas do sector, unha actividade que non debe confundirse cos alugueres turísticos”.