O Museo de Belas Artes da Coruña acolle unha mostra sobre a figura de Isaac Díaz Pardo cun percorrido pola súa polifacética traxectoria.
O conselleiro de Cultura, Lingua e Xuventude, José López Campos, presentou a mostra ‘A barca de Caronte. A travesía vital de Isaac Díaz Pardo’, que profunda na súa obra desde a etapa pictórica e plástica ata a de deseñador industrial.
No acto, López Campos destacou que se trata de “unha gran oportunidade para visualizar todo o seu mundo creativo nun mesmo espazo”. Ademais, apuntou ao compromiso do Goberno galego “coa divulgación do legado de personaxes destacados da nosa cultura a través dos nosos espazos museísticos”.
As máis de 150 pezas procedentes da colección familiar, do propio museo coruñés e doutras entidades e institucións abarcan óleos, debuxos, cerámicas e mobiliario. A proposta abrirá as súas portas o próximo 19 de xuño e poderá visitarse ata o 14 de decembro.
