Unhas mil persoas conformarán o dispositivo de seguridade con motivo da celebración do San Xoán na Coruña, segundo informou a alcaldesa, Inés Rey, tras presidir a Xunta Local de Protección Civil. Foi nunha comparecencia ante os medios de comunicación na que participou tamén a artista Laura Pato, que deseñou o cartel deste ano. Nunha festa de Interese Turístico Internacional na que se prevé a asistencia dunhas 150.000 persoas só na zona das praias e a súa contorna, haberá unha repartición de máis de 120 toneladas de madeira, con puntos para a súa distribución que estarán desde o día 22 a cargo de 43 persoas.
O dispositivo de seguridade estará coordinado desde o Centro de Mando Móbil, que se situará, como cada ano, na Coraza. Comezará oficialmente ás 05.30 horas do día 23. Os cortes de tráfico no paseo marítimo produciranse a partir das 19.00 horas e o baño estará prohibido ás 22.00 horas. Haberá un posto médico, 12 cámaras de vixilancia, distribución de colectores para a reciclaxe e un servizo especial de salvamento e socorrismo, que disporá de dúas embarcacións para emerxencia, ademais de bombeiros e outros efectivos.
A alcaldesa da Coruña incidiu en que non se poden baixar “cousas de casa” para queimar nas fogueiras e que tampouco se pode facer acampada para gardar un sitio, facendo un chamamento especial aos pais para que non deixen que os seus fillos ou fillas o fagan. Para animar a participar na campaña de recollida de vidro repartiranse 3.000 entradas para o Aquapark de Cerceda. Como en anos anteriores, a rexedora Inés Rey fixo un chamamento á “responsabilidade” e ao coidado dos areais coa recollida e reciclaxe do lixo. Todo para que o día 24 poidan, unha vez limpas as praias, volver ser usadas pola cidadanía en xeral. Para iso, procederase ao desaloxo e limpeza das mesmas a partir das seis da mañá dese día.
