A alcaldesa da Coruña, Inés Rey, pediu que se respecte a presunción de inocencia en relación ás investigacións da Garda Civil que consideran que o exasesor do exministro José Luís Ábalos, Koldo García, “se valía” de Isabel Pardo de Vera como presidenta de Adif para a “manipulación” de procesos de contratación.
A exsecretaria de Estado de Transportes fora elixida para dirixir o Plan Estratéxico da Coruña 2030-2050, así como o proxecto Coruña Marítima, que determinará a reordenación dos peiraos urbanos, pero tomou a decisión de renunciar ao cargo para “evitar controversias políticas artificiais” polas polémicas xurdidas. Agora, o xuíz do ‘caso Koldo’ imputou a Pardo de Vera por malversación e tráfico de influencias. O maxistrado cítaa a declarar pola contratación de Jésica R., exparella de Ábalos, en dúas empresas públicas.
Cuestionada sobre este asunto en rolda de prensa, a rexedora sinalou que non se leu o informe elaborado polos axentes da Unidade Central Operativa (UCO) “por falta de tempo” e decatouse do caso “polos medios”. Non entanto, apuntou que “xa saíra a noticia de que fora a declarar”. “Hai que respectar a presunción de inocencia e que continúen as investigacións pertinentes como en calquera outra investigación”, apostilou.
