A maxistrada do Xulgado de Instrución nº3 da Coruña, en funcións de garda, decretou o ingreso en prisión provisional, comunicada e sen fianza, do home detido tras unha pelexa multitudinaria entre feirantes que se saldou cun ferido de arma branca.

O suceso produciuse este xoves durante a montaxe das barracas das festas do Burgo. O home está a ser investigado por lesións cualificadas utilizando instrumento perigoso, segundo informou o Tribunal Superior de Xustiza de Galicia (TSXG).

Por outra banda, a xuíza decretou tamén a posta en liberdade das dúas persoas — nai e fillo — que pasaron a disposición xudicial polos mesmos feitos. Ambas están investigadas por un delito de tenencia ilícita de armas.

A consecuencia do ocorrido, o Concello de Culleredo e a Garda Civil reforzaron a vixilancia na zona e o rexedor do municipio, José Ramón Rioboo, advertiu que suspenderá as festas se se repiten altercados. Os festexos están previstos do 23 ao 28 deste mes.

FEITOS

Segundo trasladou a Garda Civil, na liorta estiveron implicadas “entre 20 e 30 persoas”. Durante o desenvolvemento do dispositivo, engade, os axentes levaron a cabo a detención dun home de 26 anos como presunto autor dun delito de lesións graves. Segundo as primeiras pescudas, este individuo agrediu a outro home cunha arma branca, producíndolle unha ferida de prognóstico grave.

Paralelamente, os efectivos observaron a unha muller e a un home que “portaban envolvido un obxecto de notables dimensións”. Ao proceder á súa identificación, comprobaron que se trataba un arma de fogo manipulada e que carecía da documentación regulamentaria.

Por tanto, procedeuse á detención de ambas as persoas — ela, de 52 anos e el, de 20 — como presuntos autores dun delito de tenencia ilícita de armas.