O comité de empresa de Resonac Graphite na planta da Coruña denuncia que a compañía realizou sete despedimentos o pasado 14 de xullo, polo que convoca un calendario de protestas.
Nun comunicado, o comité mostra o seu desacordo “coa forma en que se produciron” estes despedimentos, xa que considera “especialmente doloroso que, nesta ocasión, non se contou coa parte social para explorar alternativas que puidesen evitar estas saídas forzosas”.
“Entendemos as dificultades polas que atravesa a organización. O negocio dos eléctrodos de grafito experimentou nos últimos anos unha forte presión por parte do mercado, marcada por unha caída continuada de prezos e por prácticas de dumping por parte de provedores chineses, que afectaron gravemente á competitividade do sector. Con todo, non compartimos nin o fondo nin as formas desta decisión”, explica.
Lembra a súa “disposición ao diálogo” a través de “diversas propostas e medidas co fin de minimizar o impacto no emprego e protexer aos traballadores”. “Lamentablemente, a resposta por parte da dirección foi negativa”, quéixase. No entanto, reitera a vocación de diálogo futuro coa dirección.
Así mesmo, os representantes dos traballadores nesta planta –que conta con máis de 200 empregados– anuncian un calendario de protestas. Haberá paros na fábrica e concentracións na entrada que se iniciarán o 30 de xullo, mércores (de 12,00 a 13,00 horas). Estas mobilizacións continuarán os días 6, 13 e 20 de agosto.
A EMPRESA
Por parte de Resonac trasládase a Europa Press que o negocio de grafito “atravesa un contexto complexo marcado pola situación actual do mercado”, “nese marco viuse a necesidade de tomar decisións operativas para adaptarse a estas condicións”.
A compañía asegura que “mantivo, mantén e manterá” un dialogo “aberto e construtivo” con representantes dos traballadores con “responsabilidade e respecto” ás persoas.
