O Concello da Coruña acometerá un plan de actuación “pioneiro” para revitalizar os barrios “como motor de progreso urbano e cohesión social”. Contará cun investimento total de 125,3 millóns de euros.

“Nunca antes a cidade contara cun documento que ordena os investimentos públicos por distritos e define prioridades concretas en cada barrio”, expuxo a alcaldesa herculina, Inés Rey. Fíxoo durante a presentación do proxecto e recalcou que “o fai integrando visións políticas, técnicas e sociais”.

O Plan ten “carácter estratéxico”, inclúe “máis de 330 actuacións repartidas por toda a cidade” e estrutúrase en dúas fases, segundo dixo. A primeira abarca desde 2025 ata abril de 2027 e a segunda, de maio dese ano a decembro de 2028.

“Non é unha listaxe pechada é un documento dinámico que vai ir marcando a folla de ruta de maneira planificada, coherente, progresiva e equilibrada”, incidiu. Neste sentido, avanzou que “a partir de setembro haberá unha rolda de encontros en diferentes distritos para dar a coñecer o documento en detalle e recoller suxestións”.

AS XUBIAS

Así mesmo, a rexedora foi cuestionada sobre a actualización da proposta de convenio co fondo de investimento europeo Ginkgo Advisor para o desenvolvemento da rehabilitación integral de barrio das Xubias. Respecto diso, anunciou que “a previsión é poder levalo esta mesma semana a un pleno extraordinario que será previsiblemente o xoves 31”.

En concreto, entre as alegacións e propostas incorporadas, Inés Rey destacou a “posibilidade de aumentar ata un 20% a vivenda protexida na área”. “Esperamos que poida ser aprobada”, sinalou.

“É unha actuación integral nunha área degradada que se vai a facer con máximo respecto á historia dese núcleo, á identidade específica que ten esa zona e con criterios de máximo respecto pola contorna de sustentabilidade”, subliñou sobre este proxecto.