O Festival de Cine Curto de Ribadeo celebraba a pasada semana a súa cuarta edición. E entre as propostas tócanos destacar unha estrea moi especial: “Ratiña”, a nova curtametraxe da cineasta galega Alicia Úbeda (A Coruña, 1995), que tivo a súa primeira proxección pública no marco deste encontro cinematográfico.
Ribadeo é a terra materna de Alicia Úbeda, para quen esta estrea convírtese nun encontro moi especial por ese motivo. En palabras da directora, “faime moi feliz que o primeiro lugar onde se vexa “Ratiña” sexa no cinema ao que iba con meu avó de pequena”.
“Ratiña” é unha peza social e intimista rodada na Coruña en xullo de 2024, que afonda nunha perspectiva pouco tratada do acoso escolar: como se vive e se xestiona dentro do fogar, especialmente cando os adultos carecen de ferramentas emocionais para acompañar os seus fillos e fillas. A historia, contada en galego, parte dunha situación aparentemente cotiá para revelar unha realidade abafante: a soidade e o silencio da infancia mal comprendida.
Con Alicia Úbeda á fronte do guión, dirección e dirección de arte, e producida por ela xunto a Brava e Mordisco Films, “Ratiña” aposta por un estilo visual minimalista e poético, combinado cunha narrativa realista e fondamente emocional. A curta está baseada nunha historia real da directora, e protagonizada por actores e actrices recoñecidos e emerxentes como son Luis Zahera (no papel de pai da directora), Carmen García (a súa irmá pequena) e Sara Ferro.
“Ratiña” nace da vontade de dar voz a vivencias reais que seguen sen ter presenza no audiovisual galego, ofrecendo unha historia honesta, coidada e necesaria. A súa participación no Festival de Cine Curto de Ribadeo marca un primeiro paso para facer deste proxecto unha ferramenta cultural e educativa de longo percorrido.
Paralelamente a esta esperada estrea, Alicia Úbeda xa traballa na produción da súa segunda curtametraxe, “Garabato”, tamén producida por Brava, que forma parte dun mesmo universo de ficción xunto coa longametraxe en desenvolvemento “Chorima”.
A directora herculina Alicia Úbeda debuta en ficción con “Ratiña”
Bea Villar e Belén Puime, finalistas nos Mestre Mateo: “Este ano é o ano das webseries”
