Este sábado 11 de outubro celebrarase unha nova sesión da segunda edición do ciclo Folk no Colón, que reúne sobre as táboas do Teatro Colón a algunhas das mellores formacións de música tradicional galega e internacional. Será a quenda de Milladoiro, banda pioneira e símbolo do folk galego contemporáneo.

As últimas entradas continúan á venda a través de Ataquilla e no despacho de billetes da praza de Ourense. O propio día da función, o sábado 11, poderanse adquirir localidades no propio despacho de billetes do Teatro Colón.

Con máis de catro décadas de experiencia, Milladoiro foi capaz de levar os sons tradicionais de Galicia a escenarios de todo o mundo, desde Escocia ata Estados Unidos, mantendo sempre acendida a chama da nosa identidade cultural a través da música. A súa proposta combina instrumentos ancestrais, composicións propias e melodías de raíz, cunha sensibilidade artística que emociona a xeracións enteiras.

Neste concerto, o grupo repasará algunhas das pezas máis emblemáticas do seu repertorio, celebrando a beleza e a forza da música de raíz cunha posta en escena elegante, íntima e chea de matices. Unha oportunidade única para redescubrir a alma sonora de Galicia cunha das súas bandas máis internacionais.

O ciclo Folk no Colón continuará a partir de novembro coas seguintes actuacións:

• 9 de novembro: Tiruleque.
• 21 de novembro: Felisa Segade.
• 20 de decembro: Xabier Díaz & Adufeiras de Salitre.
• 26 de decembro: Carlos Núñez.