A Asociación de Familiares de Enfermos de Alzheimer da Coruña (Afaco) celebrará os días 27 e 28 de novembro un congreso na cidade herculina, na que expertos nacionais e internacionais debaterán sobre “avances e desafíos” neste ámbito.
Para o mesmo, segundo informa, seguen abertas as inscricións. O encontro, que se celebrará no paraninfo do reitorado coruñés, reunirá a expertos nacionais de referencia en diagnóstico temperán, novos tratamentos, terapias non farmacolóxicas, modelos de atención e soidade non desexada.
“Tras anos dicindo ‘non hai nada’, por fin entramos nunha etapa con tratamentos que modifican o curso en fases iniciais.”, afirma Celia Pérez Sousa, neuróloga do complexo hospitalario universitario da Coruña (Chuac) e presidenta do comité científico do congreso.
A especialista subliña que este avance “obriga a reorganizar o modelo asistencial: unidades multidisciplinares, enfermaría xestora de casos e circuítos áxiles de diagnóstico e seguimento”.
