O responsable da Agrupación de Protección Civil de Culleredo foi detido hai uns días por suposto malos tratos no ámbito familiar, segundo fontes próximas ao caso consultadas por Europa Press.

En relación a estes feitos, o Concello de Culleredo emitiu un comunicado no que expresa “o seu total rexeitamento e condena cara a calquera forma de violencia machista, reafirmando o seu compromiso coa defensa dos dereitos das mulleres e coa promoción dunha sociedade libre de violencia de xénero”.

Tamén afirma que “respectará en todo momento o proceso xudicial en curso, así como o principio de presunción de inocencia recoñecido pola lexislación vixente, evitando calquera valoración que puidese interferir na investigación ou afectar as partes implicadas”.

“Axiña que como se tivo coñecemento da detención, o Concello iniciou os protocolos internos previstos para este tipo de situacións, en coordinación coas autoridades competentes”, remarca.

“Dada a casuística concreta deste caso, onde o presunto agresor e vítima son voluntarios dunha agrupación que por lei está vinculada co Concello ao colaborar na prestación dun servizo público de seguridade, os servizos xurídicos do Concello estudan as medidas cautelares a aplicar e as vías a seguir nesta situación”, apostila.