O Concello da Coruña abriu o prazo para optar á residencia artística ‘Latitude 43’, na cidade da Coruña e destinado a autores de todo o mundo.
Tal e como subliñou o Goberno local nunha nota de prensa, este programa pretende “promocionar a creación literaria en condicións de excelencia na cidade, achegando ao beneficiario un contexto e espazo óptimo para o desenvolvemento do seu talento”.
Convocada pola Asociación Escrita Creativa 1863, a bolsa oferta unha dotación que cobre o traslado, manutención e aloxamento para a persoa beneficiaria da estancia durante un mes.
Ademais, a persoa que obteña a residencia terá acceso gratuíto a museos, galerías, bibliotecas, concertos, encontros literarios, obras de teatro e outros eventos culturais, co obxectivo de que “dispoña de todos os estímulos posibles para avanzar no seu proxecto”. Tamén, terá a oportunidade de ofrecer un encontro público para mostrar a súa obra en Galicia durante o tempo de residencia.
Así, ofrécese unha estancia en residencia para autores de calquera xénero literario, procedencia e idioma do mundo na Residencia Literaria 1863 da Coruña durante o mes de abril de 2026.
Poderá optar a esta bolsa calquera escritor maior de 18 anos con, como mínimo, dous libros publicados, en todo tipo de xéneros literarios, para calquera idioma do mundo.
