A alcaldesa da Coruña, Inés Rei, pediu a dimisión do conselleiro de Presidencia, Xustiza e Deportes, Diego Calvo, polas súas advertencias de que a Policía adscrita (UPA) deixaría de prestar funcións non autonómicas, como a protección de vítimas de violencia machista, se o Ministerio de Interior non mellora o seu financiamento.
“Unhas declaracións como esas o único que teñen que ir é seguidas da dimisión”, sentenciou a rexedora. Rei cualificou a actitude de Calvo de “irresponsable” e “bochornoso”, acusándoo de “facer política cunha secuela” e de utilizar a angustia das vítimas para “xerar un novo enfrontamento co Goberno de España”. “Como tardou e non vai pedir desculpas, debería dimitir. Coa violencia de xénero non se xoga“, afirmou Rei, cuestionando se as cifras de vítimas lle parecen ao conselleiro “como para facer política”.
RESPOSTA SOBRE OS ALUGUERES
Noutra orde de cousas, e preguntada pola diminución de contratos de aluguer na Coruña (segundo un informe da Consellería de Vivenda), Inés Rei confirmou que este descenso se deu “nesta e en todas as cidades”, citando un 44% de baixada en Pontevedra.
A alcaldesa contrapuxo os datos do informe autonómico defendendo que A Coruña é a “única cidade galega na que os prezos do aluguer contivéronse”, mentres que en Vigo, por exemplo, o prezo subiu 15 euros. A rexedora cifrou en 1.865 os contratos realizados na Coruña de xuño a novembro, fronte aos 1.743 de Vigo.
Finalmente, criticou a “orientación política clara do PP” no informe, asegurando que a pesar das “políticas destrutivas do PP”, o goberno municipal aplicará os mecanismos legais para garantir unha vivenda digna tras a declaración de mercado tensionado.
