A sexta edición do Encontro Mundial de Humorismo (EMHU) celebrarase do 23 de abril ao 3 de maio na Coruña. Serán 11 xornadas co obxectivo de “visualizar, a través do seu cartel, unha perspectiva diferente do humor”.

Segundo traslada o Concello herculino, nesta ocasión, o evento de comedia porá o foco no sorriso. “Concretamente, no xesto físico e gráfico do acto de sorrir, a través do icónico ‘smiley’ creado por Franklin Loufrani, transformado agora nun superheroe no que, todo o seu corpo, está feito de sorrisos”, apunta.

O EMHU dará a coñecer parte da súa programación a semana próxima na que tamén se activará a venda de abonos e entradas para os diferentes espectáculos.

Para o concelleiro de Cultura e Turismo, Gonzalo Castro, “o humor é forza e enerxía e, por tanto, tamén é saúde e vida”. “Rir reduce os niveis de cortisol, mellora o sistema inmunolóxico e favorece a circulación”, asevera.