O grupo de goberno (PSOE) e o BNG presentaron esta mañá o seu principio de acordo para sacar adiante, no vindeiro pleno, os Orzamentos Municipais de 2026. Rey agradeceulle ao BNG e ao seu portavoz a “capacidade de poñer a cidade por riba de calquera outro interese” á hora de acordar as contas, mentres que dende o BNG aseguraban onte que valoran moi positivamente a recuperación dos orzamentos participativos -suprimidos en 2025- e as competencias de control plenario sobre as contas, as chamadas bases de execución.
O grupo asegurou que a conxelación de taxas para o 2026 tamén foi clave para brindar o seu apoio.
Un orzamento total que ascende a 375 millóns de euros, que chegan aos 406 millóns sumándolle o dos organismos dependentes. As contas descríbense en catro eixes:
- economía e mellora dos servizos públicos;
- novos equipamentos e planificación estratéxica da cidade;
- políticas de benestar, vivenda e protección social;
- mobilidade sostible, espazos verdes e accesibilidade, e a aposta polos barrios como factor de cohesión social.
Dentro da planificación estratéxica da cidade, a alcaldesa citou investimentos como os máis de 4 millóns destinados a Cidade das TIC, para a que tamén se fará un plan director, o impulso ao Plan Estratéxico A Coruña 2030-2050 ou a continuidade do programa Coruña Marítima.
Os investimentos globais previstos na cidade no 2026 suman máis de 58 millóns de euros e inclúen intervencións como a rehabilitación do edificio A Terraza de Méndez Núñez, as novas oficinas municipais de Atención Cidadá, a redacción do proxecto de renovación do Fórum Metropolitano, as novas dependencias municipais na Fábrica de Tabacos, o remate da estación intermodal, a nova biblioteca e aula dixital de Palavea, a nova biblioteca e aula dixital de Novo Mesoiro, o espazo multiusos da Bágoa de San Roque, a segunda fase do parque do Observatorio e o novo equipamento de Santa Lucía, entre outros.
O carácter social dos orzamentos supón unha parte troncal das contas públicas, cun incremento de 2 millóns de euros no programa de axuda no fogar e incrementos tamén nas partidas destinadas a bolsas comedor e bonotaxi. Ademais, mediante o acordo alcanzado co BNG, recupéranse tamén os orzamentos participativos, dotados con 2,6 millóns de euros e con carácter bianual.
Ademais, as contas incorporan case 20 millóns de euros para o pago do bonobús, a cifra máis elevada orzada na Coruña para ese fin.
A alcaldesa destacou tamén o peso que as políticas de Vivenda teñen nas contas, que inclúen máis de 4 millóns de euros para o edificio municipal de vivenda en alugueiro social de Xuxán mais que tamén reflicten a dotación de 1,5 millóns de euros para que EMVSA poida xestionar 500 vivendas municipais en alugueiro, número que se seguirá incrementando nos vindeiros anos.
As contas prevén tamén 7 millóns de euros no Plan de instalacións deportivas municipais, tanto para a mellora das instalacións existentes como para novas pistas.
Tamén no ámbito cultural se recollen melloras co Plan de instalacións culturais, con atención especial ao Fórum e ao Teatro Rosalía, e con novos investimentos previstos, como as bibliotecas de Palavea e Novo Mesoiro.
En canto ás políticas medioambientais, Rey anunciou a aprobación dunha partida para un Plan de arboredo para actuar en todo o municipio mais tamén reiterou o compromiso da licitación de Nostián nos vindeiros días. As contas inclúen melloras nas áreas caninas e tamén na cala de Bens.
Plan de barios
As contas do 2026 danlle continuidade ao Plan de barrios 2025-2027, cun investimento total que supera os 58 millóns para todos os barrios da cidade. Os investimentos inclúen os compromisos municipais para o remate das obras da intermodal, cun millón de euros, e tamén a partida para o abono dos accesos ao novo CHUAC, con máis de 4,2 millóns.
Máis novas
Inés Rey non dimitirá e o BNG e a dirección do PSdG apoian a medida
