Todos os anos por estas datas, as pequenas familias da ouruga procesionaria do piñeiro baixan das polas e percorren as rúas do parque de Santa Margarida. Este lepidóptero defoliador (Thaumatopoea pityocampa), que se alimenta durante a maior parte do seu ciclo biolóxico das follas dos piñeiros.
A súa proliferación, refire Jorquera, está a xerar unha importante preocupación social, nomeadamente polo perigo que representa non só para a masa forestal -a praga pode provocar a morte dos piñeiros-, mais tamén para os animais de compañía e até para as crianzas.
De aí que que o portavoz do BNG no Concello, Francisco Jorquera, rexistrou un rogo escrito por medio do cal insta o Goberno Local a que tome medidas perante a “crecente presenza” do lepidóptero coñecido como procesionaria do piñeiro no Parque de Santa Margarida.
Con este rogo escrito o BNG empraza o Goberno Local a que nos traballos de mantemento da masa arbórea do Parque de Santa Margarida “se teña presente a presenza de procesionaria do piñeiro e se articulen decontado os protocolos necesarios para evitar quer a súa extensión quer os problemas de saúde pública que da súa presenza se poidan derivar, mesmo sen desbotar a debida sinalización informativa dirixida á veciñanza que cada día desfruta deste importantísimo espazo público da cidade”.
