Xa avisaban de que a pesar do rescate por parte do Concello, continuarían as súas mobilizacións. E así o fixeron. Persoal das escolas deportivas municipais da Coruña secundaron unha manifestación ante o Palacio Municipal de María Pita e unha xornada de paro, á que seguirán outros os días 9, 12 e 13, en demanda do “pago inmediato dos salarios” e un novo prego de condicións que inclúa melloras retributivas e laborais.
Os convocantes destacaron o seguimento “ao 100%” do persoal nunha xornada de paros convocados previamente ao anuncio do goberno local de retirar a concesión a Serviplus, quedando a empresa pública municipal Emuvsa a cargo da xestión das instalacións.
En declaracións aos medios, Roberto de Deus, un dos representantes do colectivo de traballadores, destacou o “paso dado” co anuncio realizado polo goberno local respecto da xestión de forma temporal. No entanto, reclamou que se lles aclaren as condicións de subrogación e tamén garantías sobre o novo contrato.
Con motivo das folgas do venres e o día 13, hai convocada unha concentración, ás 12.00 horas, ante o Palacio dos Deportes de Riazor, mentres que o 12 de xaneiro o persoal sairá en manifestación desde Riazor ata a praza de María Pita.
Sobre a súa situación, e a preguntas dos xornalistas, a alcaldesa, Inés Rey, insistiu en que o goberno local “fixo o que tiña que facer, requirir á empresa o pago dos salarios e rescatar a concesión”, sinalou ante os incumprimentos a este respecto.
Mentres, avanzou que “nun mes ou mes e medio” estará xa o prego para a adxudicación do servizo a unha nova empresa. “Os salarios abonaranse proximamente e con retroactividade do acordo”, engadiu.
Máis novas
O persoal das Escolas Deportivas Municipais continúan coas súas mobilizacións a pesar do rescate
