O goberno local da Coruña incidiu na consolidación da “contención” do aluguer desde a entrada en vigor da zona tensionada. “A cidade rexistra unha nova baixada do prezo medio e lidera en Galicia a firma de contratos, segundo datos oficiais do Observatorio de Vivenda de Galicia”, remarca.
Ademais, sostén que o prezo medio de xaneiro a xullo “foi de 735,86 euros mentres que de agosto a decembro, tras a declaración de zona tensionada, a media descende ata os 712,80 euros”. “Esta evolución contrasta coa doutras cidades galegas como Vigo e Pontevedra, onde os prezos de aluguer continúan á alza”, engade. Neste sentido, a rexedora, Inés Rey, sinalou que A Coruña “segue sendo a cidade co prezo máis elevado, pero aos poucos seguimos avanzando non só na súa contención senón na baixada”.
Por outra banda, o goberno local deu outro paso no seu plan de regularización das vivendas de uso turístico na cidade, “reforzando o persoal do servizo municipal de Urbanismo para a posta en marcha dun programa temporal, a tres anos vista, que axudará a axilizar a tramitación dos expedientes relativos a este tipo de vivendas”.
POSTURA DO PP
En contraposición, e sobre o mercado tensionado, desde o PP, o seu portavoz municipal, Miguel Lorenzo, asegura que os datos de 2025 “confirman que a zona tensionada é un fracaso: cos gobernos socialistas dispárase o prezo da vivenda porque hai menos oferta e máis demanda”. A solución non pasa polo intervencionismo: na Coruña en só cinco meses de zona tensionada, pasouse de 713 contratos en xullo a 210 en decembro, polo que desapareceu o 70,5% da oferta, e no último ano, con respecto a decembro 2024, hai un descenso no número de contratos do -5,1%, e un incremento do +7,2 % no prezo do aluguer”, engade.
VIVENDAS TURISTICAS
Xa en relación ás medidas vinculadas ás vivendas turísticas, a Asociación Galega que agrupa ao sector, Aviturga, expresa a súa preocupación ante o anuncio de reforzar o departamento de Urbanismo cunha partida de 700.000 euros “destinada a intensificar o control e peche de vivendas de uso turístico”, sostén no seu caso.
“Esta decisión supón un novo paso nunha estratexia de restrición e persecución que non resolverá os problemas de vivenda da cidade e que xa demostrou efectos contraproducentes noutros municipioss aplicar a zona tensionada do Estado“, argumenta. “As vivendas que agora se pretende dar de baixa levan operando legalmente na Coruña desde 2017, ata 2024 o Concello non esixiu declaración de inicio de actividade”, sinala, entre outros argumentos, e en relación a unha ordenanza que teñen recorrida ante o Tribunal Superior de Xustiza de Galicia (TSXG).
