O fútbol moderno cambia, e Riazor así o está a vivir nestas últimas campañas. Como acontece no Coliseum co Basquet Coruña, o espectáculo está asumindo parte do protagonismo que monopolizou o deporte, e os afeccionados debátense entre as novas modas que asolagan a meirande parte de eventos deportivos en todo o estado e a identidade serena que reinou ata esta década nos estadios.
O “Oh, Oh, Oh” do “Sweet Caroline” substituíu hai tempo ao “Y digo Deportivo”; as zonas VIP van roubando asentos ordinarios; a figura do speaker invade as conversas tácticas e os djs e a música a todo trapo apaga os cánticos tanto ao comezo como cando se marca un gol; os bailes e os concursos do descanso pode que fagan máis ameno o bocata pero eclipsan aqueles intermedios de toques e filigranas; a mascota Oito percorre, cal estrella do cine, as redes sociais do club; e por non falar da pixelada “biquiñocam”…
Con todo isto, foi o famoso fume, que saltou por erro cando Patiño mandou un gol ao lateral da rede, o que fixo saltar a chispa de boa parte da afección.
Así se leva falando esta semana nos grupos de whastapp de colegas branquiazuis (un dos milagros sociais que conseguiu a mensaxería instantánea), e así tamén o sinalan hoxe nun comunicado os Riazor Blues, no que denuncian o “ridículo” vivido en Riazor durante o pasado domingo ao converter o estadio nun “evento ianqui” e esquecer a identidade que nos trouxo ata aquí.
Un colectivo que, en todo caso, ten moitas cousas que revisarse, como deixar de vestir de negro como o resto de colectivos nazis e vestir as cores do seu equipo; recuperar cánticos de ánimo real (a poder ser en galego, que tanto defenden a campaña #oDeporédaCoruña); deixar de repetir arengas cheas de insultos e faltas de respecto; deixar de lanzar obxectos ao campo ou evitar quedar para zoscarse con afeccións rivais.
Con todo, parece complicado loitar contra o “show bussiness” e as aspiracións dunha directiva que non vivíu aqueles tempos de empanada e bota de viño. O novo himno, que parece estar no forno, pode ser o que marque o camiño.
