Bandas e artistas como Arde, Jonydasvie, Montedapena, Raze e Terrae Dj’s incorpóranse ao cartel da sétima edición do Atlantic Price que se celebrará na Coruña do 5 ao 12 de xullo. Este novo talento galego súmase aos nomes previamente confirmados: Miriam Rodríguez, Whigfield e Choriza May.
“Power pop, pop-punk, pop urbano, World Music, electrónica, músicas de baile e sons de raíz encherán o escenario”, segundo confirma a organización deste festival “gratuíto e inclusivo” impulsado pola Asociación Orgullo Coruña (ORCO).
Así mesmo, apunta que “non faltarán a cítaa formatos híbridos, performance, danza e impactantes proxeccións audiovisuais”. “Un ano máis, no programa do ‘Orgullo do Norte’ terán cabida grandes figuras pop de hoxe e de sempre, coloridas actuacións de drags, picadas de dj’s de referencia da escena galega e estatal e a celebración dun Certame de literatura LGTBIQ+”, detalla.
Recalca, ademais, que o Atlantic Pride está “destinado a reivindicar a liberdade afectiva, sexual e de identidade desde unha perspectiva lúdica e inclusiva, con propostas musicais para todos os públicos”.
Este evento conta co patrocinio institucional do Concello da cidade herculina, o apoio da Deputación provincial e o patrocinio de Estrela Galicia, Coruña The Style Outlets e Globalgrafic.
[Galería]: 45.000 persoas ratificaron o Atlantic Pride como a cita máis Orgullosa do norte do estado
